Un Pronto Soccorso da ricoverare (Vernacolo Catanzarese)

giovedì 21 novembre, 2019

Catanzaro, 21 novembre - Penzati cchi sforzu sovrumanu cci vò... ppemma scrivi nù penzeru ironicu... de na situaziona cchi c'esta ma ciangi!!!

Si voi ma scrivi n'cuna cosa ppemma ti nescianu i lacrimi e i chianti...

cchi puru l'occhi do giganta Golia si faceranu a bumbuluna e l'inchieranu na piscina comunala...

cchi puru alla strega e biancaneve cci scapperanu i lacrimi e cci dicera alla signorina Bianca... ca e megghiu ma mora ccu na mela m'belenata... ca ppemma và nta sala d'aspettu do prontu soccorsu nosthru...

cchi puru Buscetta... comu pentitu e mafia... si pentera do pentimentu cchi ficia all'epoca e ripentendusi... dicera ca u signura u crocifiggiru nto prontu soccorsu e ca fu... ppe a mancanza e perzonala cchi non riusciru ma cci tagghianu a lingua a Giuda... quandu thradiu a Gesù...

Mi perdivi puru eu!!! Cchi stacia cuntandu!!! On mi ricordu cchiu, cchi volia ma dicu!!!

Ah si...

Insomma si voi ma ciangi... basta ma veni allu prontu soccorsu da città nostrha!!!

Ma i chianti... on ti nescianu ppe u dispiacira de sofferenzi e chiddhi poveri perzuni cchi arrivanu ccu doluri e tutti i tipi... si vabbó... certu... puru ppe chiddhi... on è ca haiu u cora pilusu!!!

MA PPE TUTTU CHIDDHU CCHI SUCCEDA DINTRA STU PRONTU SOCCORSU!!!

Mammareddha quanti genti cchi ci sunnu!!!

U mercatinu da marina e Catanzaru... a cunfrunta, esta quattru gatti, nu paru e cani e pulici allu seguitu!!!

Genti cchi gridanu comu pacci... ccu u sangu all'occhi... cchi... si cci misureranu a pressiona o i battiti do cora... na cinqucentu assumigghiera a na Ferrari...

Perzuni cchi arrivanu sani e si n'da tornanu alla casa malati...

Poveri cristi cchi i vidi jettati subba chiddhi seggi e ferru... cchi dormanu n'te l'attesa pemma sunnu chiamati... cchi on ti rendi cuntu si ti trovi allu spitala o allu dormitoriu comunala... (sempra si ci fussera)...

Malati cchi i vidi passiara ccu a busta e l'urina attaccata alli vrazzi cchi on sai si hai ma ridi o ma ciangi...

M'permeri e dottori... (2 in tuttu)... de cui unu all'accettaziona... cchi allu postu do stetuscopiu... caminanu e giranu armati ccu na pistola... omma sunnu acchiappati a caci... pugni e fantalati... de genti...

Guardi giurati... (95 in tuttu)... cchi... ccu nu mitra... perquisiscianu i parenti de malati... omma hannu bumbi a manu nta sacca de pantaloni... ca si spagnanu ppe nomma fannu saddara all'aria u spitala...

Genti... cchi si vindanu u codicia russu a chiddhi cchi l'hannu jancu... ppemma si ponnu pagara a bolletta da lucia o do gas... cchi ti vena u dubbiu omma si stroppiaru apposta o curteddhiaru a socera volontariamente... (beh subba chissu on haiu dubbi)...

Perzuni... cchi quandu torni dopu 15 jorni ppe u controllu... i trovi assettati sempra allu stessu postu... cchi l'hannu ancora e chiamara e cchi n'to frattempu alla trasmissiona e chi l'ha visto... dezzaru a notizia da scomparsa...

Atri... invecia... prima ma i dunanu ppe dispersi... penzaru bbonu ma si fannu u cambiu e residenza nto prontu soccorsu...

Amici... cchi non vidi e nu saccu e tempu... e ca si non sai comu l'hai e rintracciara... basta ma vai allu prontu soccorsu e i trovi sicuru... poi chiaramenta cci domandi comu va... e iddhi ti rispundanu... tuttu a postu!!! Mo dicu eu... ma comu fa ma è tuttu a postu si ni trovamu n'to spitala!!!

Scusatimi n'attimeddhu... ma a parta u fattu ca stu prontu soccorsu... esta e ricoveru... però... m'haiu è fermara... ca stannu chiamandu a mmia...

E poi... haiu e avvisara i figgjhioli... ma venanu ma si ricogghianu u frigoriferu a televisiona e u fornellu elettricu cchi m'avia fattu portara n'te l'attesa ca mi chiamavanu all'accettaziona!!!

Salvatore Procopio

Argomenti:

Ospedale