Nel ricordo di un padre... (Vernacolo Catanzarese)

CATANZARO, 07 AGOSTO - C'è sunnu compleanni cchi quandu arrivanu... ti vena nu nudu alla gola e... l'occhi n'cumincianu ma diventanu lucidi, e si gonfianu a tala puntu... finu a cchi na lacrima nescia fhora... e si n'da schinda ammenzu na rughiceddha da faccia tua

C'è sunnu jorni cchi quandu arrivanu... ti ricordanu certi momenti... cchi su fissati n'to cerbeddhu toi... comu fannu i radici e n'alberu  menthra sta criscendu... 

C'è sunnu attimi chi... quandu cacci e dintrha a borzetta... o do portafogghi na fotografia da tua... abbrazzatu cu pathrittha, pemma a fai vidira ad ancunu... cci fai capiscira... ca tanti cosi non ci potisti dira, ma cchi volivi ma ci dici... primu tra tutti... ca ci volivi bena... 

E allora penzu e dicu... 

Cu esta chiddha perzuna, cchi... 

on'ava na fotografia do pathra soi... 

subba u tavulu do soggiornu da casa, cchi quandu a guarda... quasi comu ppe rispettu... cci cacci a purberata da parta e subba... 

o... megghiu ancora attaccata alla pareta do corridoio e puru ca passi mille voti, l'addirizzi sempra nu pochiceddhu, comu si ci fussera ancunu chi a stortigghia apposta... 

o... subba a scrivania do lavoru, cchi ogni vota cchi c'incroci u sguardu, ti si vagnanu l'occhi e... finisti e lavorara... 

o... n'ta machina... sutta l'aletta do parasula, cchi quandu a vasci... ca a sfera do sula ti n'ceca l'occhi... tai e fermara ca non vidi cchiu a strata, ppe i lacrimi cchi cumincianu ma nescianu... 

o... dintra u cora toi... n'te chiddhu anguleddhu, duva teni stipati certi emozioni e certi ricordi... accussì gelosamenta... cchi sulu ma senti pronunciara ad ancunu, u nomu e pathrittha... ti si ferma u mundu e tuttu chiddhu cchi c'hai n'tornu a tia... e tornandu arretu ccu a memoria e na vrancata d'anni... para ca chiddhi pochi attimi cchi passaru... diventaru seculi... 

Nu pathra cchi si po' definira tala, d'hera a vita sua ppe nu figghiolu e cci perdunera puru u sbagliu cchiu randa... e... chissà quanti voti avera volutu ma ti fa nescira o ricogghjira quandu volivi tu... ppecchì magari l'amici toi facianu accussí... ma iddhu on u potia fara, forza ppecchì iddhu  penzava e guardava luntanu... penzava a quandu tu nu jornu averi diventatu pathra o mamma... e ccu i figghioli toi... magari t'averi cumpurtatu comu ficia iddhu na vita prima... 

Cu u sapa quanti voti averi volutu, patrittha ppemma t'abbrazza e ma ti dicia ca ti vo bena e ca si a vita sua... e ojia... quandu vidhi na fotografia da sua... ti penti ca magari on un facisti tu...

ma tu u sai ca iddhu... avia nu cora accussi randa, ca si sulu potia parrara, t'avera dittu na jiumara e paroli. 

Cui nu patrha... sapa ca ci respunda, si vai e ci fai na visita... non capiscia a  fortuna cchi ava... e non c'esta cosa cchiu bella... prima ma esta troppu tardi... ma ti l'abbrazzi e ma cci dici... Papà... ti vogghiu bena.

(Dedicata)

Salvatore Procopio